Dyma waith ar y gweill sy’n datblygu fel rhan o fy Nghymrodoriaeth Cymru’r Dyfodol - ymchwil greadigol i fawndiroedd a sut mae hyn yn siapio fy syniadau am ecoleg, cerfluniau a iaith.

I roi cyd-destun, mae’r Gymrodoriaeth wedi fy annog i ymestyn fy ffyrdd arferol o weithio. Canlyniad hynny yw ‘Gweld trwy’r gors’, sy’n symud rhwng ymchwil safle-benodol, darlith berfformiadol, ac archwiliad cerfluniol. Dw i wedi cael y cyfle i rannu’r gwaith ar y gweill mewn digwyddiadau amrywiol gan gynnwys Cynhadledd Mawndiroedd yr IUCN yn y Cairngorms, Earth Rising yn IMMA Dulyn a Before the Object: Material Histories, Infrastructures, and Ecologies ym Mhrifysgol Gelf HBK Braunschweig.





Fy sylfeini gludiog ar hyd y flwyddyn fu corsydd crynedig Cymru, yn benodol Cors Gyfelog, Eifionydd (ychydig filltiroedd o fy stiwdio) a Chors Crymlyn, Abertawe – safleoedd sydd dan ofal Cyfoeth Naturiol Cymru ac yn rhan o brosiect adfer LIFEquake. Ar hyn o bryd dw i’n gweithio ar ffurf sy’n dod ag elfennau fy mhrosiect at ei gilydd, yn cynnwys ffilm, seinwedd a gosodiad fydd yn cael ei rannu yn Stiwdio Cadnant, Caernarfon a Stiwdio Griffith, Coleg Celf Abertawe yn bellach mlaen eleni.  








Mae mawnogydd yn dirweddau amwys sydd ddim yn hawdd i’w dehongli ar yr olwg gyntaf: maen nhw’n gudd, yn dawel. Dyma diroedd ansefydlog sy’n llawn gweadau gludiog a photensial. Maen nhw’n cydblethu amser daearegol, botanegol a diwylliannol, ac yn gynefinoedd sy’n cwestiynu ein arferion ac yn c ynnig fframweithiau materol a chysyniadol ar gyfer ailgyfeirio.




Mae mawn yn gorchuddio 4% o arwynebedd Cymru, ac mae’n storio traean o’r holl garbon sy’n y pridd. Mewn cors iach, mae 1mm o fawn yn ffurfio mewn blwyddyn, felly mae metr yn cynrychioli mil o flynyddoedd. Mae mawn yn cymryd ei amser. Mae’r safleoedd yma’n fapiau dwfn sy’n ein helpu i ddarllen y gorffennol a dychmygu’r dyfodol.

Nesaf:

25.2.2025
Podlediad ‘Why Women Grow’
gydag Alice Vincent ar Gors Crymlyn

27.3.2025
Noson o rannu yn Stiwdio Cadnant, Caernarfon
yng nghwmni Dylan Huw

Saesneg