Artist ac ymchwilydd ydy Manon Awst, sy’n archwilio safleoedd drwy greu gosodiadau, ffilmiau a pherfformiadau. Craidd ei gwaith yw’r ffordd y mae defnyddiau’n llifo a thrawsnewid yn gyson, sy’n golygu fod llefydd byth yn aros yr un fath. Felly, mae pensaerniaeth a dinasoedd, cerrig ac arfordiroedd, dyffrynoedd a mynyddoedd yn endidau byw mewn gofod ac amser, sydd fel clai i’r dychymyg.

Yn wreiddiol o Fôn, astudiodd Bensaerniaeth ym Mhrifysgol Caergrawnt ac wedyn Artistic Research yn y Royal College of Art, Llundain. Enillodd Ysgoloriaeth Bensaerniaeth Eisteddfod Genedlaethol Casnewydd a’r Cylch 2004 cyn symud i ddinas Berlin lle bu hi’n cyd-weithio â’r artist Almaenig Benjamin Walther yn datblygu prosiectau celf rhyngwladol. Cafodd gwaith Awst & Walther ei arddangos yn Kunstmuseum Wolfsburg, Kunstverein Nürnberg, Kunstverein Braunschweig, Georg Kolbe Museum, Boros Collection, Cass Sculpture Foundation, Oriel Mostyn, Oriel Davies ac mewn amryw o orielau ac amgueddfeydd eraill ledled Ewrop. Mae ganddynt ddarnau celf parhaol i’w gweld yn Nant Gwrtheyrn ac ar sgwâr Rosa-Luxemburg-Platz yn Berlin. Cafodd llyfr sy’n crynhoi eu gwaith ei gyhoeddi yn 2019 gan Distanz.

Yn 2015 derbyniodd Manon Wobr Cymru Greadigol gan Gyngor Celfyddydau Cymru, a sefydlodd ei stiwdio yng Nghaernarfon. Yn ogystal â datblygu gosodiadau a chomisiynau celf, mae hi’n mwynhau barddoni ac yn perfformio yn rheolaidd mewn digwyddiadau barddonol ac efo'r grŵp Cywion Cranogwen. Ar hyn o bryd, hi yw Cydlynydd Creadigol Gofodau Cyhoeddus Pontio, Prifysgol Bangor.



Ebost
manonawst@hotmail.co.uk

Twitter
@manonawst