CADWCH Y DYDDIAD:
Gwener 21 Tachwedd, 5 – 7pm
Digwyddiad clo gyda sgwrs rhwng Manon Awst a Dylan Huw
Mae CORSIO gan Manon Awst yn benllanw pedair blynedd o ymchwil cerfluniol ar fawndir Cymru.
Berf go anghyfarwydd yw corsio sy’n disgrifio suddo a glynu mewn cors. Mae'n deitl addas ar gyfer arddangosfa sy'n cynnig ffyrdd o suddo'n ddwfn i ddeunydd tirwedd, ac yn archwilio sut mae gweithiau cerfluniol yn glynu yn ecolegol dros amser. Mae'r gair hefyd yn gysylltiedig â 'llacio', sy'n cysylltu â sut mae’r artist yn cydweithio’n chwareus â safleoedd a'u deunyddiau.
Mae'r arddangosfa'n cynnwys ffilm, propiau cerfluniol, cerddi a samplau sy'n rhoi ffurf i ymchwil greadigol a myfyrdodau wedi eu gwreiddio yn ffeniau alcalïaidd Ynys Môn a chorsydd crynedig Eifionydd a Chrymlyn, Abertawe. Trwy ymchwiliadau perfformiadol a deunyddiau cyfansawdd, mae hi'n cofleidio mawn fel sail dwfn sydd â photensial i bylu ffiniau rhwng yr hyn sy'n solet/hylif, gwlyb/sych, byw/marw, sefydlog/ansicr, dynol/mwy-na-dynol.
Bydd cyfansawdd cerfluniol newydd yn cael ei greu ar leoliad yn Stiwdio Griffith – arbrawf o gydweithio perfformiadol gyda deunyddiau a gasglwyd o ffeniau a chorsydd lleol. Mae’r deunyddiau hyn yn cysylltu â gwaith adfer mawndiroedd ac arferion adfywiol heb golli’r cyffyrddiad chwareus, gofodol sy’n nodweddu gwaith yr artist.
Mae CORSIO yn cynnig gofod i ddod i adnabod gwead cyfoethog tiroedd sydd weithiau’n ymddangos yn anhygyrch neu'n anghysbell. Ymhell o fod yn naturiol a chyntefig, dyma gynefinoedd sydd wedi’u mowldio dros amser gan gymunedau dynol a mwy-na-dynol. Er mwyn suddo a glynu mewn cors mae gofyn bod yn agored i dir sydd yn wlyb, araf ac annisgwyl.
Crëwyd llawer o’r gwaith yn yr arddangosfa yn ystod Cymrodoriaeth Cymru’r Dyfodol wedi ei chefnogi gan Gyngor Celfyddydau Cymru, Cyfoeth Naturiol Cymru, Peak Cymru, Yr Ymddiriedolaeth Genedlaethol ac Elan Links.
Lluniau gan Dewi Lloyd